|
Tja, entlich schriib ich mal, wies mir bis jetzt so ergange isch, sit ich weg
vo dihei bi. Ich ha nöd früehner gschribe, will ich immer recht früeh müed
worde und is Bett gange bi... Tja, Jetlag halt!
Also, min Flug uf Singapore isch extrem agnehm gsi. Ich ha Feisterplatz gha
und extrem grosses Unterhaltigsprogramm.
In Singapur acho, han ich überhaupt kei Problem gha, mis Gate z'finde... all mini
Befürchtige, de Flug z'verpasse oder mich z'verirre, hend sich nid bewahrheitet.
In Singapur isch alles zimlich übersichtlich und klar beschriftet.
Uf em Flug vo Singapur nach Brisbane han ich aber öfters so mini Moment
gha. Vor allem wo stärcheri Turbulenze ufcho sind. Ich ha mich recht müesse
beruhige und mit Film, Musik und Games ablenke.
In Brisbane acho, han ich bemerkt, dass ich als einzigi keis Ireiseformular
zum usfülle becho han. Tja, eigentlich hani das ersch bemerkt, wo e
Flughafemitarbeiterin mich denach gfröget het...hehe. Aso, si het mer den eis
ge und ich ha, während d'Lüt nebed mir i de Schlange witervorgrückt sind,
alles versuecht uszfülle.. bis ich au endlich dur d'Passkontrolle cho bi,
sind d'Gepäck vo de Singapore Airlines scho lang vom Flüssband gsi. Tja,
wer het das echt nöd gwüsst und isch wartend vor eme Flüssband gstande
und het öpe zum dritte mal beobachtet, wie di gliche fremde Köffer
verbifahred? Richtig... ich! Hehe, tja, ich bi den so schlau gsi, e
Flughafemitarbeiterin z'fröge, wo mich denn ufklärt het.
Duss acho, sind anderi studente und ich abgholt worde, um zu eusne Familie
bracht z'werde.
Mini Familie het mich fründlich und liebevoll i ihrem Heim ufgnah, mir mis
Zimmer und s'Hus zeiget. Sit ich da bin, sind all us de Familie extrem nett und
au fürsorglich. Ich verstah mich mit allne recht guet. Au mit de zwei anderne
Studentinne, wo da wohned.
I d'Schuel chani scho ganz alei mit em Bus fahre... hehe und au i d'Stadt!!
Naja, aso d'Schuel selber, de Campus isch recht schön. Ich bi am Afang recht
gstresst gsi vo mine Lehrer, wo Panik gmacht hend, dass de Kurs keis
Zuckerschlecke si wird und blabla... "a lot homework"... "3-4 hours a day!" etc.
Ich bi extrem apisst gsi. Jetzt hani mi bits erholt vom Schock.
Mini Klass isch zwäg. Ich verstah mi guet mit allne. Krass isch, dass es da
extrem vill Schwiizer het. I minere Klass sicher 90%. Das macht aber nüt,
will mir eh all Englisch redet, damit eus di andere verstönd. Und eigentli
ischs au nid erlaubt i de eigete Landessprach mitenand z'rede.
So, vo Brisbane selber han ich leider nanig vill gseh. Ich bin ersch zwei mal
churz i d'Stadt. Aber, es gfallt mer recht. Nur scho de Weg über d'Brug uf die
ander Siite vom Brisbane River... isch eifach genial mit de Towers und so...
Bis jetzt isch au s'Wetter nur zu minere z'Frideheit!! Am Tag schiint d'Sunne
zimli starch und s'isch glichziitig recht typpig. Me muess echt ufpasse i de
sunne, will mer sich unglaubli schnell verbrenne chan!! Mengisch wür mer
echt gern in Brisbane River go bade ga... Doch das isch nid würki zempfelle.
There are sharks!!! En kolleg vo mir het das nid gwüsst und isch gu
schwimme gange... leck de het echt Glück gha, dass nüt passiert isch! Jetzt
hani übrigens i de Nachrichte ghört, dass e 20-jährigi im Meer vome Hai
agriffe worde und im Spital gstorbe isch... shit!
Ich ha s'Glück, dass ich nach de Schuel im Swimming-Pool vo minere Hostfamily
cha e Abchüelig neh...
Die letschte drü Nächt hemmer nach de extrem heisse Tagestemperature e
zimlichi Abchüelig becho. Zimlich heftigi Stürm mit Dunner, Hagel und
Blitz. Gester sind in ganz Brisbane i 65000 Hushält de Strom usgange. Und
innerhalb vo drü Stunde sind 13000 Blitz zellt worde!
So, jetzt weiss ich nix mehr z'verzelle... usser, dass mer en chline herzige
Geko im Hus gha hend... min Hostvater het en für mich gföttelet. Übrigens
sind die beide Hosteltere au scho Grosseltere... ich ha ihre 16-monat alt
Enkelsohn Kayan kenneglernt und is herz gschlosse... er isch abr nu churz uf
Bsuech gsi... en chline herzige, aber freche Pfuderi!!
Ok, morn gan ich mit de Familie en Usflug go mache, drum söti jetzt ma go
schlafe... ich bi na di Einzig im Hus, wo wach isch...
miss u all...
bye!
|